Saudiya Arabistoni futbol federasiyasi (CAFF) funksioner atrofida davom etayotgan mojarolarga qaramay, FIFA prezidenti Janni Infantinoni qo‘llab-quvvatlashini ma’lum qildi.
«Saudiya Arabistoni futbol federasiyasi direktorlar kengashi bugun, 2026 yil 27 avgust, payshanba kuni bo‘lib o‘tgan yig‘ilishda FIFA prezidenti Janni Infantino va bosh kotib Mattias Grafstryom tomonidan e’lon qilingan qo‘shma bayonotni olqishladi. Unda yo‘l qo‘yilgan xato tan olingani, FIFA Forward Enterprise loyihasi bo‘yicha taklifni ko‘rib chiqishdan voz kechilgani hamda ushbu taklif bilan bog‘liq tartib-taomillarni qayta ko‘rib chiqish majburiyati qayd etilgan.
Kengash yuz bergan voqeadan tegishli xulosalar chiqarish, tartib-taomillar va kommunikasiya mexanizmlarini takomillashtirish, boshqaruv tamoyillarini mustahkamlash hamda kelajakdagi muammolarni birdamlik va shaffoflik ruhida hal etish borasidagi majburiyatlarni yuqori baholadi. Ushbu majburiyatlarni amalga oshirish, ayniqsa futbol tizimi ichida qarashlar turlicha bo‘lgan sharoitda, ishonchni mustahkamlashning muhim asosi ekani ta’kidlandi.
Kengash futbolni yanada rivojlantirish xalqaro tizimning birdamligi va turli tomonlarning muvofiqlashtirilgan sa’y-harakatlarini talab qilishini ta’kidladi. Shu munosabat bilan FIFA, qit’aviy va milliy federasiyalar o‘rtasida muloqot va hamkorlikni kengaytirishga chaqirildi. Bunda futbol, futbolchilar va muxlislar manfaatlarini birinchi o‘ringa qo‘yish muhimligi qayd etildi.
Saudiya Arabistoni futbol federasiyasi milliy federasiya va Osiyo futbol konfederasiyasi a’zosi sifatida o‘z prezidenti shayx Salmon Al Xalifaning Osiyo futboli manfaatlarini himoya qilishdagi rolini yuqori baholaydi va qit’aviy federasiya bilan samarali hamkorlikni davom ettirishini tasdiqlaydi. CAFF xalqaro futbol oilasida muloqot, konsensus va birdamlikni mustahkamlashga qaratilgan barcha sa’y-harakatlarni qo‘llab-quvvatlashga tayyor.
Shu nuqtai nazardan, CAFF direktorlar kengashi FIFA prezidenti Janni Infantinoning qariyb 10 yil davomida futbol oilasi birdamligini mustahkamlash, sportni yanada rivojlantirish va uning ommaviyligini oshirish borasidagi doimiy sa’y-harakatlarini qo‘llab-quvvatlashini va yuksak qadrlashini yana bir bor bildirdi. Global darajadagi hamkorlik barcha tomonlar, futbolchilar va dunyo bo‘ylab muxlislar manfaatlariga xizmat qiladi. Shuningdek, kengash so‘nggi uchta Jahon chempionatida erishilgan salmoqli yutuqlarni alohida qayd etdi», — deyiladi CAFF rasmiy saytida.
Avvalroq Infantino FIFAning asosiy erkaklar va ayollar musobaqalarini nazorat qilishi kerak bo‘lgan FIFA Forward Enterprise kompaniyasini tashkil etish tashabbusini ilgari surgan edi. Federasiya hisob-kitoblariga ko‘ra, loyihani amalga oshirish taxminan 4,2 milliard dollar miqdorida mablag‘ oqimini ta’minlashi, shuningdek, FIFAga a’zo assosiasiyalar daromadlarini oshirish va jahon miqyosida futbolni rivojlantirishga yordam berishi mumkin edi.
Biroq ushbu taklif futbol konfederasiyalari va tashkilotlarining bir qator keskin tanqidlariga sabab bo‘ldi. UYEFA, KONKAKAF, OFK va KONMEBOL tashabbusni qo‘llab-quvvatlashdan voz kechdi. Bundan tashqari, UYEFA mazkur konsepsiyadan rasman voz kechilmaguncha, FIFA homiyligidagi musobaqalarni boykot qilish niyatida ekanini ma’lum qildi.
