«Liverpul»ning sobiq hujumchisi, hozirda Qatarning «Ac-Sadd» klubi futbolchisi bo‘lgan Roberto Firmino Yurgen Klopp qo‘l ostida mersisaydliklar safida o‘tkazgan davri haqida xotiralari bilan o‘rtoqlashdi.
«Biz hali ham ba’zida yozishib turamiz. Men Yurgendan juda minnatdorman, chunki u faoliyatimda menga juda katta yordam bergan. Dastlab, “Liverpul”ga endi o‘tgan paytimda menga oson bo‘lmagan, ammo u haqiqatan ham menga ishongan. U menga o‘z jamoasi uchun qanchalik muhim bo‘lishimni aytgan», — deya Firminoning so‘zlarini The Athletic keltirmoqda.
Roberto Firmino 2015 yildan buyon «Liverpul» safida o‘ynagan. Braziliyalik hujumchi «qizillar» tarkibida 352 ta o‘yinda maydonga tushib, 107 ta gol urgan va 78 ta golli uzatmani amalga oshirgan. Firmino «Liverpul» bilan Angliya chempioni (2020) va Chempionlar ligasi g‘olibi (2019) bo‘lgan, mersisaydliklar safida jami 7 ta sovrinni qo‘lga kiritgan.
