Madridning «Real» klubi bosh murabbiyi Joze Mourinyo jamoa yangi futbolchisi Yan Diomande haqida fikr bildirdi.

«Qaymoqranglilar» 19 yoshli vingerni «RB Leypsig»dan 125 million yevroga sotib olgan. La Liganing «Malaga»ga qarshi bugungi o‘yinida (4:0) ivuarlik futbolchi 65-daqiqada zaxiradan maydonga tushdi.

«Diomande juda ko‘p ishlayapti, u kamtar, o‘rganishni xohlaydi, mening va jamoadoshlarining gaplariga quloq tutadi. Uning vaqti hali keladi. Sizlar doim uning transfer qiymati haqida gapirasiz. Qancha edi — 100 yoki 120 millionmi? Aniq eslay olmayman. U juda iqtidorli, ammo hali juda yosh va sodda. U darhol butun ligadan ustun bo‘lib ketadigan futbolchi emas. Xotirjam bo‘ling, voqealarni tezlashtirish shart emas», — deya Mourinyoning so‘zlarini Madrid Zone keltiradi.

Bunga qadar o‘tkazilgan ikki uchrashuvda ham portugaliyalik murabbiy Diomandeni o‘yinning so‘nggi qismiga yaqin maydonga tushirgan.