"Arsenal" egasi Sten Kronkega tegishli Kroenke Sports + Entertainment kompaniyasi "Los-Anjeles Eynjels" beysbol klubining nazorat paketini Arte Morenodan sotib olish bo‘yicha kelishuvga erishdi.
Bitim Major League Baseball hamda liga klublari egalari tomonidan ma’qullanishi kerak. Kutilishicha, jarayon 2027 yilning birinchi choragida yakunlanadi.
Xabarlarga ko‘ra, "Eynjels" 4 milliard dollarga baholangan. Agar bitim shu summada amalga oshsa, bu MLB tarixidagi eng qimmat klub sotuviga aylanadi va joriy yilda "San-Diyego Padres" uchun to‘langan 3,9 milliard dollarlik rekordni yangilaydi.
Arte Moreno klubni 2003 yilda 183,5 million dollarga sotib olgan edi.
Kronke KSE orqali allaqachon bir qator yirik sport jamoalariga egalik qiladi. Ular orasida "Arsenal", "Los-Anjeles Rems", "Denver Naggets", "Kolorado Evelansh" va "Kolorado Repids" bor.
Yangi bitim Kronkening AQSH sport industriyasidagi ta’sirini yanada oshiradi.
"Eynjels" so‘nggi yillarda natijalar borasida qiyin davrni boshdan kechirmoqda. Jamoa so‘nggi 16 mavsumning 15 tasida pley-offga chiqa olmagan va 2026 yilda ketma-ket 11-mavsumni salbiy g‘alaba-mag‘lubiyat balansi bilan yakunlash xavfi ostida turibdi.
