Nigeriya terma jamoasi vingeri Filip Otelening «Lasio»ga mavsum oxirigacha ijara asosida o‘tishi bo‘yicha kelishuv amalga oshmay qoldi, deya xabar bermoqda All Nigeria Soccer.
Italiya klubi va futbolchining «Bazel» klubi transfer shartlarini yakuniy kelishib ololmagani sababli bitim barbod bo‘lgan.
Otele «Lasio»da tibbiy ko‘rikdan o‘tish uchun Rimga yo‘l olishga «Bazel»ning ruxsatini kutayotgan edi, ammo Shveysariya klubi bunga rozilik bermagan.
Dastlabki kelishuvga ko‘ra, «Lasio» ijara uchun 1,5 million yevro to‘lashi, keyin esa futbolchini 2,5 million yevroga sotib olish huquqiga ega bo‘lishi kerak edi. Agar «Lasio» mavsum davomida Italiya kubogida g‘olib chiqsa yoki Yevropa ligasi yoki Chempionlar ligasiga yo‘llanma olsa, sotib olish huquqi majburiy transferga aylanishi belgilangan edi. Shuningdek, Otele jamoa safida rasmiy uchrashuvlarda kamida 30 marta maydonga tushgan taqdirda, «Bazel» yana 250 ming yevro bonus olishi kerak edi.
