Нигерия терма жамоаси вингери Филип Отеленинг «Лацио»га мавсум охиригача ижара асосида ўтиши бўйича келишув амалга ошмай қолди, дея хабар бермоқда All Nigeria Soccer.
Италия клуби ва футболчининг «Базель» клуби трансфер шартларини якуний келишиб ололмагани сабабли битим барбод бўлган.
Отеле «Лацио»да тиббий кўрикдан ўтиш учун Римга йўл олишга «Базель»нинг рухсатини кутаётган эди, аммо Швейцария клуби бунга розилик бермаган.
Дастлабки келишувга кўра, «Лацио» ижара учун 1,5 миллион евро тўлаши, кейин эса футболчини 2,5 миллион еврога сотиб олиш ҳуқуқига эга бўлиши керак эди. Агар «Лацио» мавсум давомида Италия кубогида ғолиб чиқса ёки Европа лигаси ёки Чемпионлар лигасига йўлланма олса, сотиб олиш ҳуқуқи мажбурий трансферга айланиши белгиланган эди. Шунингдек, Отеле жамоа сафида расмий учрашувларда камида 30 марта майдонга тушган тақдирда, «Базель» яна 250 минг евро бонус олиши керак эди.
