AQSH terma jamoasi bosh murabbiyi Maurisio Pochettino "Monako" hujumchisi Folarin Balogunning "Everton"ga amalga oshmay qolgan transferi haqida hali futbolchining o‘zi bilan gaplashmaganini, ammo yaqin kunlarda unga qo‘ng‘iroq qilishni rejalashtirayotganini aytdi.

Avvalroq 25 yoshli amerikalik futbolchi "Everton"ga o‘tishdan voz kechgan edi. OAV ma’lumotlariga ko‘ra, transfer shartlari klublar va futbolchining o‘zi bilan kelishib olingan. Biroq angliyaliklarda Balogunning tibbiy ko‘rigi bo‘yicha savollar paydo bo‘lgan va shundan so‘ng hujumchi fikrini o‘zgartirib, "Monako"da qolgan.

"Bu murakkab vaziyat, chunki siz qarorga ta’sir qila olmaysiz. Faqat futbolchilar va qaror qabul qilayotgan insonlarni qo‘llab-quvvatlashingiz mumkin.

Albatta, Flo bilan bog‘liq shunday alohida vaziyatlarda yaqin kunlarda unga qo‘ng‘iroq qilaman. "Everton" bilan bog‘liq voqealardan keyin unga biroz vaqt berishni istadim.

Nima bo‘lganini uning o‘zidan bilishni xohlayman, ammo eng muhimi, unga doimo qo‘llab-quvvatlashimizni bildirish. U biz uchun muhim futbolchi. Jahon chempionatida ham jamoamiz uchun muhim edi. U o‘zining eng yaxshi o‘yinini ko‘rsatishi mumkin bo‘lgan joyni topishiga umid qilaman", — deya Pochettinoning so‘zlarini ESPN keltirdi.

Balogunning "Monako" bilan shartnomasi 2028 yil 30 iyunga qadar amal qiladi. U AQSH terma jamoasi safida 31 ta o‘yin o‘tkazib, 12 ta gol urgan.