АҚШ терма жамоаси бош мураббийи Маурисио Почеттино "Монако" ҳужумчиси Фоларин Балогуннинг "Эвертон"га амалга ошмай қолган трансфери ҳақида ҳали футболчининг ўзи билан гаплашмаганини, аммо яқин кунларда унга қўнғироқ қилишни режалаштираётганини айтди.
Аввалроқ 25 ёшли америкалик футболчи "Эвертон"га ўтишдан воз кечган эди. ОАВ маълумотларига кўра, трансфер шартлари клублар ва футболчининг ўзи билан келишиб олинган. Бироқ англияликларда Балогуннинг тиббий кўриги бўйича саволлар пайдо бўлган ва шундан сўнг ҳужумчи фикрини ўзгартириб, "Монако"да қолган.
"Бу мураккаб вазият, чунки сиз қарорга таъсир қила олмайсиз. Фақат футболчилар ва қарор қабул қилаётган инсонларни қўллаб-қувватлашингиз мумкин.
Албатта, Фло билан боғлиқ шундай алоҳида вазиятларда яқин кунларда унга қўнғироқ қиламан. "Эвертон" билан боғлиқ воқеалардан кейин унга бироз вақт беришни истадим.
Нима бўлганини унинг ўзидан билишни хоҳлайман, аммо энг муҳими, унга доимо қўллаб-қувватлашимизни билдириш. У биз учун муҳим футболчи. Жаҳон чемпионатида ҳам жамоамиз учун муҳим эди. У ўзининг энг яхши ўйинини кўрсатиши мумкин бўлган жойни топишига умид қиламан", — дея Почеттинонинг сўзларини ESPN келтирди.
Балогуннинг "Монако" билан шартномаси 2028 йил 30 июнга қадар амал қилади. У АҚШ терма жамоаси сафида 31 та ўйин ўтказиб, 12 та гол урган.
