«Fiorentina» sobiq bosh murabbiy Fabio Grossoga nisbatan intizomiy chora qo‘llash imkoniyatini ko‘rib chiqmoqda. Klub shu orqali uni ishdan bo‘shatish bilan bog‘liq xarajatlarni kamaytirishni maqsad qilgan. Bu haqda Football Italia xabar berdi.
Grosso A Seriyadagi mavsumni ketma-ket uchta mag‘lubiyat bilan boshlaganidan so‘ng, 6 sentyabr kuni lavozimidan ozod etilgan edi. Uning o‘rniga Paolo Vanoli tayinlandi.
Manba ma’lumotiga ko‘ra, «Fiorentina» Grosso klub rahbariyati bilan transfer siyosati borasidagi prinsipial kelishmovchiliklar sabab ishini davom ettira olmaganini isbotlashga urinmoqda.
Shu bilan birga, murabbiy ishni davom ettirish imkonsiz ekanini bildirgan bo‘lsa-da, o‘z xohishi bilan iste’foga chiqish haqida ariza bermagan.
Agar Grossoni ishdan bo‘shatish intizomiy sabablarga ko‘ra asosli deb topilsa, «Fiorentina» uning shartnomasi tugaguniga qadar to‘lanishi lozim bo‘lgan maoshdan ozod bo‘lishi mumkin.
