«PSJ» darvozaboni Matvey Safonov Fransiya grandidagi birinchi mavsumi haqida gapirdi. U jamoaning asosiy tarkibidagi o‘rin uchun italiyalik darvozabon Janluiji Donnarumma bilan raqobat qilgan.

«Jamoaga kelganimda asosiy tarkib futbolchisi bo‘lmasligimni juda yaxshi bilardim. Birinchi mavsumim juda sermazmun o‘tdi. Zaxiradagi darvozabonning 17 ta rasmiy o‘yinda maydonga tushishi kamdan-kam uchraydi. Bu men uchun ajoyib tajriba bo‘ldi.

Donnarumma — men hozirgacha ko‘rgan eng yaxshi darvozabonlardan biri. Uning Chempionlar ligasidagi seyvlari hal qiluvchi ahamiyatga ega bo‘ldi, buni inkor qilish ahmoqlik», — deya Safonovning so‘zlarini Le Parisien keltirmoqda.

«PSJ»dagi birinchi mavsumida Safonov 17 ta o‘yinda ishtirok etib, 13 ta gol o‘tkazib yubordi va 7 marta o‘z darvozasi daxlsizligini saqlab qoldi. Donnarumma esa o‘sha mavsumda 47 ta uchrashuv o‘tkazib, 43 ta gol o‘tkazdi va 15 marta «quruq» o‘yin o‘tkazdi.