«Barselona» joriy mavsumdagi dastlabki oltita o‘yinning barchasida g‘alaba qozondi. Kataloniyaliklar La Ligadagi beshta uchrashuvda zafar quchdi, shuningdek, Chempionlar ligasida «Feyenoord»ni mag‘lub etdi.
Ma’lum bo‘lishicha, «Barselona» klub tarixida atigi to‘rtinchi marta mavsumni ketma-ket oltita g‘alaba bilan boshlamoqda.
Bunday natija ilk bor 1929/30 yilgi mavsumda, jamoani Jeyms Bellami boshqargan paytda qayd etilgan. Keyinchalik 1960/61 yilgi mavsumda Lyubisha Brochich qo‘l ostida bu natija takrorlangan.
Uchinchi marta esa 2018/19 yilgi mavsumda, Lionel Messi davrida kuzatilgan. O‘sha vaqtda «Barselona» bosh murabbiyi Ernesto Valverde edi.
Agar kataloniyaliklar navbatdagi uchrashuvda ham g‘alaba qozonsa, klub tarixida mutlaq yangi rekord o‘rnatiladi.
