«Nasaf» bosh murabbiyi Ro‘ziqul Berdiyev Osiyo Chempionlar ligasi 2 musobaqasi guruh bosqichi 1-turida «Al-Xolidiya»ga qarshi o‘yin oldidan jamoaning tayyorgarligi haqida gapirdi.

Berdiyev 15 sentyabr kuni Bahrayn milliy stadionida o‘tkazilgan matbuot anjumanida Bahrayndagi avvalgi og‘riqli xotira — 2021 yilgi OFK Kubogi finali haqida ham savollarga javob berdi.

O‘sha finalda «Nasaf» «Al-Muharraq»ga 0:3 hisobida mag‘lub bo‘lgandi. Berdiyev mazkur uchrashuv endi tarixda qolganini ta’kidladi.

«Bu voqeaga ancha vaqt bo‘ldi. “Al-Muharraq” bilan finalda o‘ynaganimiz ham tarixiy voqea edi. Finalgacha yetib borishning o‘zi ham biz uchun yomon natija emasdi», — dedi murabbiy.

Biroq Berdiyev hozirgi bahsni 2021 yilgi final bilan taqqoslashga asos yo‘qligini ta’kidladi.

«Ertaga biz “Al-Muharraq” bilan emas, “Al-Xolidiya” bilan o‘ynaymiz. Biz bu jamoani yaxshilab o‘rgandik. Ular tajribali va barqaror futbol namoyish etadi. Ertangi natija o‘sha finaldagidan butunlay boshqacha bo‘ladi, deb ishonaman», — dedi «Nasaf» ustozi.

Berdiyev «Al-Xolidiya» tarkibidagi legionerlarning harakatlariga ham alohida e’tibor qaratilganini aytdi.

«Raqibning kuchli tarkibini, ayniqsa legionerlarining individual imkoniyatlarini videolar orqali batafsil o‘rgandik. Futbolchilarimizga raqibning har bir futbolchisi bo‘yicha aniq ko‘rsatmalar berildi. Ular kimdan qanday xavf kutish kerakligini yaxshi bilishadi», — dedi murabbiy.

«Nasaf» uchun Bahrayn iqlimi ham alohida sinov bo‘lishi mumkin. Berdiyev yuqori harorat va namlikni jamoa oldida turgan asosiy qiyinchiliklardan biri sifatida qayd etdi.

«Birinchi raqamli muammo — issiq. Bahraynda harorat juda yuqori, namlik ham katta», — dedi u.

Shu bilan birga, murabbiy iqlimni bahona sifatida ko‘rsatmasligini bildirdi. Darvozabon Abduvohid Ne’matov ham har ikki jamoa bir xil sharoitda o‘ynashini ta’kidladi.

«Ertaga ikki jamoa ham bir xil issiqda harakat qiladi. Xudo xohlasa, bor kuchimizni berib, kurashamiz va yurtimizga g‘alaba bilan qaytamiz», — dedi Ne’matov.

«Nasaf» yangi Osiyo musobaqasini g‘alaba bilan boshlashni maqsad qilgan. Qarshiliklar uchun mazkur bahs nafaqat guruhdagi ilk ochkolarni qo‘lga kiritish, balki Bahrayndagi 2021 yilgi mag‘lubiyatdan keyingi yangi sahifani ochish imkoniyati ham hisoblanadi.

Osiyo Chempionlar ligasi 2 | 2026/27 | 1-tur
«Al-Xolidiya» — «Nasaf»
16 sentyabr, 21:00. Bahrayn milliy stadioni.