«Barselona»ning «Kamp Nou» stadioni 2027 yildayoq to‘liq sig‘im bilan ishlay boshlashi mumkin. Bu haqda Espai Barça direktori Joan Sentelyes ma’lum qildi.
UEFA 15 sentyabr kuni «Kamp Nou» 2029 yilgi Chempionlar ligasi finaliga mezbonlik qilishini tasdiqladi. Bu esa kataloniyaliklarga rekonstruksiya ishlarini to‘liq yakunlash uchun bir necha yil vaqt beradi.
Sentelyesning aytishicha, klub stadion 2028/29 mavsumi davomida to‘liq ishga tushishini kutmoqda. Biroq ishlar rejadagidek ketsa, muxlislar 2027 yilning o‘zidayoq arenaning to‘liq sig‘imidan foydalanishi mumkin.
«2029 yilgacha hali ancha vaqt bor. Asosiy maqsad — 2028/29 mavsumida barcha ishlar to‘liq yakunlanishi. Agar omadimiz kelsa, 2027 yilning bir qismidayoq stadionni to‘liq sig‘im bilan ishlatishimiz mumkin», — dedi Sentelyes.
Uning qo‘shimcha qilishicha, «Kamp Nou» 2029 yilgi finalga tomi va ekranlari bilan birga to‘liq tayyor bo‘ladi.
«Barselona» rekonstruksiya jarayoni davomida UEFA bilan doimiy aloqada bo‘lib turibdi. Shu bilan birga, Yevropa futboli boshqaruv organi klubga qurilish ishlarini yakunlash uchun aniq muddat belgilamagan.
