«Барселона»нинг «Камп Ноу» стадиони 2027 йилдаёқ тўлиқ сиғим билан ишлай бошлаши мумкин. Бу ҳақда Espai Barça директори Жоан Сентельес маълум қилди.
UEFA 15 сентябрь куни «Камп Ноу» 2029 йилги Чемпионлар лигаси финалига мезбонлик қилишини тасдиқлади. Бу эса каталонияликларга реконструкция ишларини тўлиқ якунлаш учун бир неча йил вақт беради.
Сентельеснинг айтишича, клуб стадион 2028/29 мавсуми давомида тўлиқ ишга тушишини кутмоқда. Бироқ ишлар режадагидек кетса, мухлислар 2027 йилнинг ўзидаёқ аренанинг тўлиқ сиғимидан фойдаланиши мумкин.
«2029 йилгача ҳали анча вақт бор. Асосий мақсад — 2028/29 мавсумида барча ишлар тўлиқ якунланиши. Агар омадимиз келса, 2027 йилнинг бир қисмидаёқ стадионни тўлиқ сиғим билан ишлатишимиз мумкин», — деди Сентельес.
Унинг қўшимча қилишича, «Камп Ноу» 2029 йилги финалга томи ва экранлари билан бирга тўлиқ тайёр бўлади.
«Барселона» реконструкция жараёни давомида UEFA билан доимий алоқада бўлиб турибди. Шу билан бирга, Европа футболи бошқарув органи клубга қурилиш ишларини якунлаш учун аниқ муддат белгиламаган.
