«Nissa»ning 37 yoshli yarim himoyachisi Aksel Vitsel Belgiya terma jamoasidagi faoliyatini yakunlaganini ma’lum qildi.
Futbolchi 2023 yilda ham milliy jamoadan ketganini e’lon qilgan, ammo keyinchalik xalqaro maydonga qaytgan edi. 2026 yilgi jahon chempionatida Vitsel ikki uchrashuvda maydonga tushdi.
«Bu safar qarorim qat’iy. Terma jamoadagi faoliyatimni yakunlashga qaror qildim.
Endi yoshlar va yangi avlodga yo‘l berish vaqti keldi. Shu 18 yil davomida maydonda bor kuchimni berganimdan nihoyatda faxrlanaman. 18 yoshimda bu yo‘lni boshlaganimda bunday yuksak natijalarga erishishimni hatto tasavvur ham qila olmasdim. Biz haqiqatan ham unutilmas lahzalarni boshdan kechirdik.
Muxlislarga rahmat. Shu yillar davomida professional o‘sishimga u yoki bu tarzda hissa qo‘shgan barcha jamoadoshlarim, murabbiylar va federasiya xodimlariga minnatdorlik bildiraman.
Terma jamoaga kelajakda omad tilayman. Ishonchim komil, uni yorqin kelajak kutmoqda.
Men seni sevaman, Belgiya», — deb yozdi Vitsel ijtimoiy tarmoqda.
Aksel Vitsel Belgiya terma jamoasida 2008 yildan buyon to‘p surib kelgan. U milliy jamoa safida 140 ta uchrashuv o‘tkazib, 12 ta gol urgan.
«Zenit»ning sobiq futbolchisi Belgiya terma jamoasi tarixida o‘tkazilgan o‘yinlar soni bo‘yicha ikkinchi o‘rinni egallaydi. Shuningdek, u mamlakat sharafini jahon chempionatida himoya qilgan eng yoshi katta futbolchi hisoblanadi.
Vitsel 2018 yilgi jahon chempionatida Belgiya terma jamoasi bilan bronza medalini qo‘lga kiritgan.
