«Ницца»нинг 37 ёшли ярим ҳимоячиси Аксель Витсель Бельгия терма жамоасидаги фаолиятини якунлаганини маълум қилди.

Футболчи 2023 йилда ҳам миллий жамоадан кетганини эълон қилган, аммо кейинчалик халқаро майдонга қайтган эди. 2026 йилги жаҳон чемпионатида Витцель икки учрашувда майдонга тушди.

«Бу сафар қарорим қатъий. Терма жамоадаги фаолиятимни якунлашга қарор қилдим.

Энди ёшлар ва янги авлодга йўл бериш вақти келди. Шу 18 йил давомида майдонда бор кучимни берганимдан ниҳоятда фахрланаман. 18 ёшимда бу йўлни бошлаганимда бундай юксак натижаларга эришишимни ҳатто тасаввур ҳам қила олмасдим. Биз ҳақиқатан ҳам унутилмас лаҳзаларни бошдан кечирдик.

Мухлисларга раҳмат. Шу йиллар давомида профессионал ўсишимга у ёки бу тарзда ҳисса қўшган барча жамоадошларим, мураббийлар ва федерация ходимларига миннатдорлик билдираман.

Терма жамоага келажакда омад тилайман. Ишончим комил, уни ёрқин келажак кутмоқда.

Мен сени севаман, Бельгия», — деб ёзди Витцель ижтимоий тармоқда.

Аксель Витсель Бельгия терма жамоасида 2008 йилдан буён тўп суриб келган. У миллий жамоа сафида 140 та учрашув ўтказиб, 12 та гол урган.

«Зенит»нинг собиқ футболчиси Бельгия терма жамоаси тарихида ўтказилган ўйинлар сони бўйича иккинчи ўринни эгаллайди. Шунингдек, у мамлакат шарафини жаҳон чемпионатида ҳимоя қилган энг ёши катта футболчи ҳисобланади.

Витцель 2018 йилги жаҳон чемпионатида Бельгия терма жамоаси билан бронза медалини қўлга киритган.