«Manchester Yunayted» «Volerenga»ning 15 yoshli qanot hujumchisi Gabriel Raykovichga qiziqish bildirmoqda. U Angliya klubini tark etish istagida bo‘lgan Jey-Jey Gabrielning o‘rnini bosishi mumkin. Bu haqda The Sun xabar berdi.
Manba ma’lumotiga ko‘ra, «Manchester Yunayted» Raykovichni kuzatib bormoqda. Yakshanba kuni klub Osloda bo‘lib o‘tgan «Volerenga» — «Fredrikstad» uchrashuviga o‘z skautini yuborgan.
Raykovich yaqinda Erling Xolandning rekordini yangilab, Norvegiya chempionati tarixida gol urgan eng yosh futbolchiga aylandi.
U «Volerenga»ning asosiy jamoasida yanvar oyida, 14 yoshida debyut qilgan. O‘tgan oyda esa 15 yoshu 166 kunligida ilk golini urdi.
Joriy mavsumda Raykovich 14 ta uchrashuvda 2 ta gol va 1 ta golli uzatma qayd etdi.
Futbolchining «Volerenga» bilan shartnomasi 2028 yil dekabriga qadar amal qiladi. Klub uning transferi uchun taxminan 18 million yevro talab qilishi mumkin.
Raykovich xorij klubiga rasman faqat 2027 yil fevral oyida 16 yoshga to‘lganidan keyin o‘tishi mumkin.
