«Barselona» yarim himoyachisi Frenki de Yong tizzasidan olgan jarohatidan tiklanish jarayonida muhim qadam tashladi — u mashg‘ulot maydonida yana to‘p bilan ishlashni boshladi.

Hozir kataloniyaliklarning aksariyat futbolchilari milliy jamoalar ixtiyorida bo‘lgani sababli, Hansi Flikning Siutat Esportivadagi mashg‘ulotlarida atigi 7–8 nafar futbolchi qatnashmoqda.

De Yong hali umumiy guruhga qo‘shilishga tayyor emas, ammo so‘nggi kunlarda uning holati sezilarli darajada yaxshilangan.

SPORT nashri ma’lumotiga ko‘ra, niderlandiyalik yarim himoyachi to‘p bilan mashq qilishni qayta boshlagan. U hozircha maydonda yakka tartibda, o‘rtacha yuklama ostida ishlamoqda va tiklanish jarayonidan mamnun.

De Yong o‘ng tizzasining ichki yon bog‘lamlari shikastlanganidan beri maydonga tushmayapti. Dastlab jarrohlik amaliyoti ham davolash variantlaridan biri sifatida ko‘rib chiqilgan, ammo «Barselona» yakunda konservativ davolash usulini tanlagan.

Bir necha hafta davomida futbolchi to‘psiz mashq qilib, asosan jismoniy mashqlar va to‘g‘ri chiziq bo‘ylab yugurish bilan cheklangan. U uchun eng katta muammo yon tomonga harakatlanish bo‘lib, bunday harakatlar bog‘lamdagi jarohat sababli og‘riq keltirib chiqarayotgan edi.

Hozir esa vaziyat ancha yaxshilangan. De Yong yana maydonda, to‘p bilan ishlamoqda va yuklamani bosqichma-bosqich oshiryapti. Shunga qaramay, u hali jamoadoshlari bilan to‘liq mashg‘ulotlarga qaytishi uchun ma’lum vaqt talab etiladi.

Hansi Flik chorshanba kuni Siutat Esportivaga qaytgach, futbolchining tiklanish jarayonini shaxsan kuzatishi kutilmoqda.

«Barselona» De Yongni maydonga qaytarishga shoshilmayapti. Hozirgi hisob-kitoblarga ko‘ra, uning umumiy guruhga to‘liq qo‘shilishiga yana 2–3 hafta kerak bo‘lishi mumkin.

Milliy jamoalar o‘yinlari uchun tanaffus yakunlangach, klub murabbiylar shtabi va tibbiy xodimlar De Yongning holatini yana bir bor baholaydi. Shundan so‘ng uning to‘liq mashg‘ulotlarga va rasmiy o‘yinlarga qaytish muddati aniqroq belgilanadi.