«Manchester Yunayted» afsonasi Pol Skoulz Pol Pogbaning 2012 yilda klubni birinchi marta tark etishiga o‘zi ham ma’lum darajada sabab bo‘lganini tan oldi. U bu haqda The Good, The Bad & The Football podkastida gapirdi.

Skoulz 2011 yil yozida faoliyatini yakunlagan, ammo oradan olti oy o‘tib, ser Aleks Fergyusonning iltimosiga ko‘ra jamoaga qaytgan edi.

«Pogba? Ha, yaxshi tanlov! Bilasizmi, uning birinchi marta ketishiga sabab bo‘lgan odamlardan biri men edim. Men 36 yoshimda faoliyatimni yakunladim, keyin esa yana qaytdim. Pol esa aynan o‘sha paytda asosiy jamoaga kirib kelishga harakat qilayotgandi.

Menimcha, u maydonga tushishni kutayotgandi, chunki yanvar oyida bizda deyarli yarim himoyachilar qolmagan edi. Hatto Rafael da Silva va Fil Jonsni markaziy yarim himoyada o‘ynatganmiz», — dedi Skoulz.

«Pol asosiy jamoaga qadam qo‘yishi kerak bo‘lgan navbatdagi yosh futbolchi edi. U 17 yoshda edi, men esa har kuni mashg‘ulotlarda unga qarshi o‘ynardim. U maydonga tushishga haqliman, deb hisoblardi.

Keyin men qaytib keldim va har hafta asosiy tarkibda o‘ynay boshladim. Shundan so‘ng uning agenti yangi shartnoma bo‘yicha takliflarni rad eta boshladi. Menimcha, uning ketishiga shu ham sabab bo‘lgan. Demak, buning uchun qisman men ham javobgarman», — deya qo‘shimcha qildi u.

«Manchester Yunayted»dan ketgach, Pogba «Yuventus»da to‘rt mavsum o‘tkazdi. 2016 yilda esa ingliz klubi uni o‘z tarixidagi rekord summa — 105 million yevroga ortga qaytardi.

Qaytib kelganidan keyin fransuz futbolchisi «Manchester Yunayted» safida 200 dan ortiq uchrashuv o‘tkazib, 39 ta gol urdi va 51 ta golli uzatma berdi.