«Манчестер Юнайтед» афсонаси Пол Скоулз Поль Погбанинг 2012 йилда клубни биринчи марта тарк этишига ўзи ҳам маълум даражада сабаб бўлганини тан олди. У бу ҳақда The Good, The Bad & The Football подкастида гапирди.

Скоулз 2011 йил ёзида фаолиятини якунлаган, аммо орадан олти ой ўтиб, сэр Алекс Фергюсоннинг илтимосига кўра жамоага қайтган эди.

«Погба? Ҳа, яхши танлов! Биласизми, унинг биринчи марта кетишига сабаб бўлган одамлардан бири мен эдим. Мен 36 ёшимда фаолиятимни якунладим, кейин эса яна қайтдим. Поль эса айнан ўша пайтда асосий жамоага кириб келишга ҳаракат қилаётганди.

Менимча, у майдонга тушишни кутаётганди, чунки январь ойида бизда деярли ярим ҳимоячилар қолмаган эди. Ҳатто Рафаэл да Силва ва Фил Жонсни марказий ярим ҳимояда ўйнатганмиз», — деди Скоулз.

«Поль асосий жамоага қадам қўйиши керак бўлган навбатдаги ёш футболчи эди. У 17 ёшда эди, мен эса ҳар куни машғулотларда унга қарши ўйнардим. У майдонга тушишга ҳақлиман, деб ҳисобларди.

Кейин мен қайтиб келдим ва ҳар ҳафта асосий таркибда ўйнай бошладим. Шундан сўнг унинг агенти янги шартнома бўйича таклифларни рад эта бошлади. Менимча, унинг кетишига шу ҳам сабаб бўлган. Демак, бунинг учун қисман мен ҳам жавобгарман», — дея қўшимча қилди у.

«Манчестер Юнайтед»дан кетгач, Погба «Ювентус»да тўрт мавсум ўтказди. 2016 йилда эса инглиз клуби уни ўз тарихидаги рекорд сумма — 105 миллион еврога ортга қайтарди.

Қайтиб келганидан кейин француз футболчиси «Манчестер Юнайтед» сафида 200 дан ортиқ учрашув ўтказиб, 39 та гол урди ва 51 та голли узатма берди.