Ispaniya terma jamoasini Millatlar ligasi guruh bosqichida Xorvatiyaga qarshi safarda qiyin uchrashuv kutib turibdi. Bu haqda jamoa bosh murabbiyi Luis de la Fuente fikr bildirdi.

Mutaxassisning aytishicha, Xorvatiya Angliyadan o‘z muxlislari ko‘z o‘ngida 0:7 hisobida og‘ir mag‘lubiyatga uchraganidan so‘ng o‘ta kuchli motivasiya bilan maydonga tushadi.

«Biz keskinlik va ehtirosga boy muhitni yaxshi ko‘ramiz. Ishonchim komilki, bu safar ham aynan shunday bo‘ladi. Xorvatlar juda kuchli motivasiya bilan o‘ynaydi, ammo Ispaniya futbolchilarida ham ishtiyoq kam emas», — dedi de la Fuente.

Jamoalar o‘rtasida Ispaniyada o‘tgan birinchi uchrashuv mezbonlarning 4:1 hisobidagi g‘alabasi bilan yakunlangan edi.

De la Fuente shogirdlari allaqachon turnirning pley-off bosqichiga chiqishni kafolatlagan. Xorvatiya esa Ispaniya va Angliyaga qarshi uchrashuvlarda umumiy 1:11 hisobida mag‘lub bo‘lgan.