Benin milliy terma jamoasi bosh murabbiyi Gernot Ror Argentinaga qarshi o‘tkazilgan o‘rtoqlik uchrashuvidan so‘ng raqib jamoa vakillarining munosabatidan noroziligini bildirdi.

Argentina terma jamoasi 3:0 hisobida g‘alaba qozongan mazkur bahs Lionel Messining milliy jamoa safidagi so‘nggi uchrashuvi bo‘ldi.

O‘yindan keyin Benin futbolchilari argentinalik raqiblari bilan futbolka almashish va Messi bilan esdalik uchun suratga tushishni istashgan. Biroq ularning bu xohishi amalga oshmagan.

Gernot Ror RMC telekanaliga bergan intervyusida vaziyatni quyidagicha izohladi:

«Ha, bu juda og‘ir bo‘ldi. Afsuslanarli yagona jihat shundaki, argentinaliklar bizga hech narsa berishmadi. Na Messi bilan suratga tushish imkoniyati, na futbolka.

Bizni hatto stadion yo‘lagiga ham, kiyinish xonasiga ham kiritishmadi», — dedi germaniyalik mutaxassis.

Rorning so‘zlariga ko‘ra, xavfsizlik xizmati Benin futbolchilarining Argentina terma jamoasi vakillari oldiga borishiga ruxsat bermagan.

Beninlik o‘yinchilar shunga qaramay, raqiblari bilan futbolka almashishga harakat qilishgan, ammo bu urinishlar ham natija bermagan.

Bosh murabbiyning o‘zi esa faqat bitta esdalikka ega bo‘lishga muvaffaq bo‘lgan.

Ror Lionel Messining 2018 yilgi futbolkasini Argentina terma jamoasi bosh murabbiyi Lionel Skaloniga topshirgan. Skaloni esa futbolkani Messiga imzolatib, keyin egasiga qaytargan.