Kataloniyaning «Barselona» klubi hujum chizig‘ini kuchaytirish maqsadida Lissabonning «Benfika» jamoasi to‘purari Vangelis Pavlidisni o‘z safiga qo‘shib olish imkoniyatini ko‘rib chiqmoqda.
Insayder Ekrem Konurning Daily Briefing nashriga tayanib xabar berishicha, 27 yoshli gresiyalik markaziy hujumchining transferiga Londonning «Tottenxem» klubi ham qiziqish bildirmoqda.
Ma’lumotlarga ko‘ra, Pavlidisning ehtimoliy transfer qiymati 100 million yevro atrofida baholanmoqda. Shu bois futbolchi uchun kurashda har ikki klub jiddiy moliyaviy xarajatlarga tayyor bo‘lishiga to‘g‘ri kelishi mumkin.
Gresiyalik hujumchi 2024 yilning iyul oyidan buyon «Benfika» sharafini himoya qilib kelmoqda. Uning Portugaliya grandi bilan amaldagi shartnomasi 2029 yilning yoziga qadar mo‘ljallangan.
Pavlidis joriy mavsumda ham yuqori sermahsullik namoyish etmoqda. U Portugaliya chempionatida o‘tkazgan yettita uchrashuvida sakkizta gol urishga muvaffaq bo‘ldi. Ushbu gollarning ikkitasi penaltidan kiritilgan.
Shuningdek, 27 yoshli hujumchi hisobida ikkita golli uzatma ham mavjud.
Hozircha «Barselona» yoki «Tottenxem» tomonidan rasmiy taklif yuborilgani haqida ma’lumot yo‘q.
