Angliya futbol assosiasiyasi «Sautgempton» klubi bosh murabbiyi Tonda Ekkertni raqib jamoa mashg‘ulotlarini yashirincha kuzatish bilan bog‘liq mojaroda ishtirok etgani uchun jazoladi.

Mutaxassisga olti haftalik shartli diskvalifikasiya tayinlandi. Ushbu jazoning ijrosi 2027/28 yilgi mavsum oxiriga qadar to‘xtatib turiladi.

Mojaro o‘tgan mavsumda Angliya Premyer-ligasiga chiqish uchun o‘tkazilgan pley-off bahslari vaqtida yuzaga kelgan.

Xususan, «Midlsbro»ga qarshi yarim final uchrashuvi oldidan Ekkert tomonidan yuborilgan klub xodimi raqib jamoaning mashg‘ulotini yashirincha kuzatayotgan vaqtda aniqlangan.

Bu harakat Angliya futbol ligasi qoidalarining buzilishi sifatida baholangan.

Keyinchalik tergov davomida shu kabi yana bir nechta qoidabuzarlik holatlari ham fosh etilgan.

Natijada «Sautgempton» «Midlsbro»ni ikki o‘yin natijasiga ko‘ra mag‘lub etib, finalga yo‘llanma olganiga qaramay, pley-off bosqichidan chetlatilgan.

Bundan tashqari, klub 2026/27 yilgi mavsumni boshlash oldidan to‘rt ochkodan mahrum qilingan.

Mazkur voqealardan so‘ng Tonda Ekkert yo‘l qo‘yilgan qoidabuzarliklar uchun omma oldida uzr so‘ragan.

Angliya futbol assosiasiyasi bosh murabbiyga olti haftalik shartli diskvalifikasiyadan tashqari 28 ming funt sterling miqdorida jarima va rasmiy ogohlantirish ham berdi.