Turkiya futbol federasiyasi (TFF) X ijtimoiy tarmog‘ida tashkilot rahbariyati va milliy jamoa murabbiylar shtabidagi kadrlar o‘zgarishi haqida xabar berdi.
«Turkiya futbol federasiyasi direktorlar kengashi bugungi yig‘ilishda navbatdagi saylovga oid umumiy yig‘ilishga qadar o‘z faoliyatini davom ettirishga qaror qildi.
Avvalroq iste’foga chiqqan ikki nafar asosiy a’zo o‘rniga direktorlar kengashining zaxira a’zolari Ibrohim Ozbay va Metin Akyuzni tayinlashga qaror qilindi.
Milliy terma jamoa bosh murabbiyi Vinchenso Montella bilan hamkorlikni davom ettirmaslikka qaror qilindi. Avvalroq TFF direktorlar kengashini tark etgan Abdulla Ayaz o‘rniga Serdar Yildiz bosh kotib lavozimiga tayinlandi.
Bundan tashqari, ayni vaqtda TFFning ro‘yxatga olish bo‘limi direktori lavozimida ishlayotgan Ahmet Erzurumlu federasiya bosh kotibining o‘rinbosari etib tayinlandi», — deyiladi tashkilot xabarida.
Vinchenso Montella 2023 yil sentyabr oyidan buyon Turkiya terma jamoasini boshqarib kelayotgandi. Uning rahbarligida turklar 2026 yilgi Jahon chempionatida ishtirok etdi.
Yevropa futbol assosiasiyalari ittifoqi (UYEFA) Millatlar ligasining joriy mavsumida esa Turkiya terma jamoasi dastlabki to‘rtta turda birorta ham ochko jamg‘ara olmadi.
