Saudiya Arabistoni Pro-ligasining 2026/2027 yilgi mavsumi 8-turidan o‘rin olgan «Al-Hilol» va «Al-Ittihod» o‘rtasidagi uchrashuv yakunlandi.
Ar-Riyod shahridagi «Kingdom Arena» stadionida bo‘lib o‘tgan bahsda mezbonlar 3:2 hisobida g‘alaba qozondi.
Uchrashuvning 11-daqiqasida «Al-Hilol» qanot hujumchisi Gabriel Martinelli Olli Uotkinsning uzatmasidan so‘ng hisobni ochdi. 22-daqiqada «Al-Ittihod» hujumchisi Yussef En-Nesiri muvozanatni tikladi.
30-daqiqada Olli Uotkins raqib darvozasini ishg‘ol qilib, mezbonlarni yana oldinga olib chiqdi. Birinchi bo‘limga qo‘shib berilgan ikkinchi daqiqada Uotkins yana bir bor gol urdi, biroq VAR tekshiruvidan so‘ng ushbu gol bekor qilindi.
Ikkinchi bo‘limning 64-daqiqasida Krisensio Sammervill «Al-Hilol»ning uchinchi golini kiritib, hisobdagi farqni ikkita to‘pga yetkazdi.
89-daqiqada esa niderlandiyalik Stiven Bergveyn penaltini aniq amalga oshirib, «Al-Ittihod»ning ikkinchi goliga mualliflik qildi. Biroq mehmonlar qolgan vaqtda hisobni tenglashtira olmadi.
Ushbu g‘alabadan so‘ng «Al-Hilol» ochkolari sonini 21 taga yetkazib, Saudiya Arabistoni chempionati turnir jadvalida birinchi o‘ringa ko‘tarildi.
Jamoaning eng yaqin ta’qibchilari — «Al-Qodisiya» va «An-Nasr» hisobida 19 tadan ochko mavjud. 17 ochko jamg‘argan «Al-Ittihod» esa to‘rtinchi pog‘onada qoldi.
Saudiya Arabistoni chempionati. Pro-liga. 8-tur.
10 oktyabr, 23:00. «Kingdom Arena» (Ar-Riyod)
«Al-Hilol» — «Al-Ittihod» — 3:2
Gollar: Martinelli, 11 (1:0), En-Nesiri, 22 (1:1), Uotkins, 30 (2:1), Sammervill, 64 (3:1), Bergveyn, 89 (3:2).
«Al-Hilol» tarkibi: Bunu, Kulibali, Teo Ernandes (Al-Harbi, 67), Al-Tambakti (Lajami, 90), Mahzari, Nosir Al-Davsari (Al-Havsavi, 81), Ruben Nevesh, Buabre (Kanno, 67), Martinelli, Uotkins (Mandash, 81), Sammervill.
«Al-Ittihod» tarkibi: Raykovich, Danilu Pereyra, Shimich, Shankiti (Al-Julaydan, 69), Faris Abdi (Fagihiy, 69), Auar (Muxtor Ali, 83), Lopi, En-Nesiri, Al-Sahfiy (Veynaldum, 58), Al-G‘amdiy (Al-SHehriy, 83), Bergveyn.
Sariq kartochkalar: Ruben Nevesh (37) — Lopi (38), Bergveyn (73), Raykovich (90+6).
