Italiyaning «Roma» klubi qanot himoyachisi Uesli Yevropa transfer bozorida bir qator top-klublar e’tiborini tortmoqda.
Bu haqda insayder Ekrem Konur ijtimoiy tarmoqdagi sahifasida xabar berdi.
Manbaning ma’lum qilishicha, Braziliya terma jamoasi futbolchisiga Angliya Premyer-ligasining uchta klubi — «Arsenal», «Tottenxem» va «Liverpul» qiziqish bildirmoqda.
Biroq «Roma» rahbariyati 23 yoshli himoyachini o‘z safida saqlab qolish niyatida. Rimliklar hozircha futbolchi bilan xayrlashishni rejalashtirmayapti.
Ueslining Italiya klubi bilan amaldagi shartnomasi 2030 yil o‘rtalariga qadar mo‘ljallangan. Braziliyalik futbolchining transfer qiymati 40 million yevroga baholanmoqda.
Qayd etish joiz, «Roma» Italiya A Seriyasining joriy mavsumida dastlabki beshta uchrashuvda 13 ochko jamg‘arib, turnir jadvalida ikkinchi o‘rinni egallab turibdi.
