Niderlandiyalik mashhur sobiq futbolchi Klarens Zeedorf murabbiylik faoliyatini qayta boshladi.
Braziliyaning «Korintians» klubi 50 yoshli mutaxassis jamoa bosh murabbiyi etib tayinlanganini rasman e’lon qildi.
Ma’lum qilinishicha, tomonlar 2027 yil oxiriga qadar amal qiladigan shartnoma imzolagan.
Zeedorf avval ham bir qator klublar va milliy terma jamoada bosh murabbiy sifatida faoliyat yuritgan. Jumladan, u 2014 yilda Italiyaning «Milan», 2016 yilda Xitoyning «Shenchjen», 2018 yilda Ispaniyaning «Deportivo» klublarini boshqargan.
Shuningdek, niderlandiyalik mutaxassis 2018–2019 yillarda Kamerun milliy terma jamoasi bosh murabbiyi lavozimida ishlagan.
Biroq Zeedorf mazkur jamoalarning hech birida uzoq muddat faoliyat olib bormagan. Uning eng ko‘p uchrashuv boshqargan davri «Milan»ga to‘g‘ri keladi — 22 ta o‘yin.
Futbolchilik faoliyati davomida esa Klarens Zeedorf, avvalo, «Milan»dagi muvaffaqiyatli o‘yinlari bilan tanilgan. U Italiya klubi safida o‘n mavsum davomida to‘p surgan.
Qayd etish joiz, «Korintians» yakshanba kuni kechqurun Braziliya chempionati doirasida safarda «Palmeyras»ga qarshi maydonga tushadi.
