Osiyo Chempionlar ligasi Elit turnirida bugun, 12 oktyabr kuni umumiy bosqichning 2-tur uchrashuvlari start oladi. G‘arb mintaqasida jami oltita bahs o‘tkazilishi rejalashtirilgan. Ularning ikkitasida O‘zbekistonning "Paxtakor" va "Neftchi" klublari ishtirok etadi.
Toshkentning "Paxtakor" jamoasi o‘z maydonida Saudiya Arabistonining "Al-Qodisiya" klubini qabul qiladi. Uchrashuv "Paxtakor" markaziy stadionida soat 18:45 da boshlanadi.
"Sherlar" musobaqaning dastlabki turida Saudiya Arabistonining "Al-Ahli" jamoasi bilan durang o‘ynab, bir ochkoni qo‘lga kiritgan edi. "Al-Qodisiya" esa birinchi uchrashuvini g‘alaba bilan yakunlagan. Shu bois Toshkentdagi bahs har ikki jamoa uchun turnir jadvalidagi mavqeini mustahkamlash nuqtai nazaridan muhim ahamiyat kasb etadi.
Farg‘onaning "Neftchi" klubini esa yanada jiddiy sinov kutmoqda. Islombek Ismoilov boshchiligidagi jamoa Ar-Riyodda Krishtianu Ronaldu to‘p surayotgan "An-Nasr" mehmoni bo‘ladi.
Farg‘onaliklar ilk turda Iroqning "Al-Quva Al-Javiya" klubini 1:0 hisobida mag‘lub etgan edi. Uchrashuv taqdirini 83-daqiqada Zoran Marushich tomonidan kiritilgan gol hal qilgan.
"An-Nasr" esa dastlabki turda BAAning "Al-Ayn" klubiga 0:4 hisobida mag‘lub bo‘ldi. Shu sababli Saudiya Arabistoni jamoasi o‘z maydonidagi bahsda birinchi ochkolarini qo‘lga kiritishga intiladi.
Kunning qolgan uchrashuvlarida "Al-Vasl" Saudiya Arabistonining amaldagi chempion "Al-Ahli" klubini qabul qiladi. Shuningdek, "Traktor" "Al-SHamal"ga, "Al-G‘arafa" "Istiqlol"ga, "Al-Quva Al-Javiya" esa "Al-Ayn"ga qarshi bahs olib boradi.
Elit OCHL. Umumiy bosqich, 2-tur
12 oktyabr. Barcha vaqtlar Toshkent vaqti bilan:
18:45 — "Paxtakor" (O‘zbekiston) — "Al-Qodisiya" (Saudiya Arabistoni)
21:00 — "Al-Vasl" (BAA) — "Al-Ahli" (Saudiya Arabistoni)
21:00 — "Traktor" (Eron) — "Al-SHamal" (Qatar)
23:15 — "Al-Quva Al-Javiya" (Iroq) — "Al-Ayn" (BAA)
23:15 — "Al-G‘arafa" (Qatar) — "Istiqlol" (Eron)
23:15 — "An-Nasr" (Saudiya Arabistoni) — "Neftchi" (O‘zbekiston)
Musobaqaning 2-turidan o‘rin olgan qolgan uchrashuvlar 13–14 oktyabr kunlari bo‘lib o‘tadi.
