Saudiya Arabistonining "Al-Qodisiya" klubi bosh murabbiyi Brendan Rojers Osiyo Chempionlar ligasi Elit turnirining 2-turidan o‘rin olgan "Paxtakor"ga qarshi uchrashuv oldidan tashkil etilgan matbuot anjumanida ishtirok etdi.
Shimoliy irlandiyalik mutaxassis Toshkent klubining o‘yin uslubiga yuqori baho berib, ijobiy natijaga erishish uchun shogirdlari eng yaxshi imkoniyatlarini namoyon etishi zarurligini ta’kidladi.
"Paxtakor"ning o‘yin uslubi haqida
"Biz ushbu uchrashuvni katta ishtiyoq bilan kutyapmiz. Musobaqani yaxshi boshladik va endi ilk bor safarda maydonga tushamiz. "Paxtakor" sifatli futbol namoyish etadigan, texnik jihatdan kuchli o‘yinchilarga ega jamoa. Ijobiy natijaga erishish uchun eng yuqori saviyamizda harakat qilishimiz kerak", — dedi Rojers.
Murabbiy raqibning taktik xususiyatlariga ham to‘xtalib, "Paxtakor"ning hujumlarni tashkil etish usulini alohida qayd etdi.
Raqibning taktik jihatlari
Rojersning ta’kidlashicha, Toshkent jamoasi hujumlarni himoya chizig‘idan boshlashga intiladi. Yarim himoyachilarning turli yo‘nalishlarda harakatlanishi esa hujumlarni rivojlantirishda muhim o‘rin tutadi.
Shuningdek, "Paxtakor" raqib maydonining so‘nggi uchdan bir qismiga yetib borgach, qanotlardan uzatmalar orqali xavfli vaziyatlar yaratishga harakat qiladi. "Al-Qodisiya" ustozi o‘z shogirdlarini aynan shu jihatlarga tayyorlayotganini bildirdi.
Futbolchilarning jismoniy holati haqida
Saudiya Arabistoni klubi 9 oktyabr kuni milliy chempionat doirasida "Al-Xulud"ga qarshi bahs o‘tkazgan. Rojers ushbu uchrashuvda futbolchilar katta jismoniy kuch sarflaganini qayd etdi.
"O‘tgan juma kuni futbolchilarimiz katta jismoniy yuklama ostida harakat qilishdi. Shunga qaramay, ajoyib o‘yin namoyish etib, yaxshi natijaga erishdik. Hozir asosiy e’tiborni ularning kuchini tiklash va jismoniy holatini yaxshilashga qaratganmiz", — dedi mutaxassis.
O‘yinga ruhiy tayyorgarlik haqida
Rojers jamoa bilan olib borilayotgan ish jarayoniga ham to‘xtaldi. Uning so‘zlariga ko‘ra, futbolchilar murabbiylar shtabi talablarini tobora yaxshiroq o‘zlashtirmoqda.
"Qariyb bir yildan buyon birga ishlayapmiz. Shu vaqt davomida futbolchilar o‘yin falsafamiz va asosiy tamoyillarimizni yaxshi tushunib olishdi. Uchrashuv oldidan ayrim taktik jihatlarni yana bir bor muhokama qilamiz. Eng muhimi, futbolchilar jismoniy jihatdan tiklanishi va ruhiy tomondan o‘yinga to‘liq tayyor bo‘lishi kerak", — dedi Rojers.
Eslatib o‘tamiz, "Al-Qodisiya" Elit OCHLning dastlabki turida BAAning "Al-Vasl" klubini 2:1 hisobida mag‘lub etgan. "Paxtakor" esa Saudiya Arabistonining "Al-Ahli" jamoasi bilan 1:1 hisobida durang o‘ynagan.
"Paxtakor" — "Al-Qodisiya" uchrashuvi bugun, 12 oktyabr kuni Toshkentdagi "Paxtakor" markaziy stadionida bo‘lib o‘tadi. Bahs O‘zbekiston vaqti bilan soat 18:45 da boshlanadi.
