«Arsenal» bosh murabbiyi Mikel Arteta jamoa futbolchilari Pyero Inkapye va Martin Subimendining jarohat olishiga munosabat bildirdi.

Inkapye Angliya Premyer-ligasi doirasida shanba kuni «Lids»ga qarshi o‘tkazilgan uchrashuvning so‘nggi daqiqalarida zaxiradan maydonga tushgan edi.

Bahs yakunlanganidan so‘ng ekvadorlik himoyachi qo‘shimcha mashg‘ulot o‘tkazish uchun maydonda qolgan va shu jarayonda jarohat olgan.

Shuningdek, «Arsenal»ning yana bir futbolchisi Martin Subimendi ham jarohatlangan. Ispaniyalik yarim himoyachi «Lids»ga qarshi uchrashuvning barcha 90 daqiqasini zaxira o‘rindig‘ida o‘tkazgan edi.

Arteta o‘yindan keyingi mashg‘ulotlar paytida futbolchilarning jarohat olishi murabbiylar shtabi uchun murakkab vaziyat ekanini ta’kidladi.

«Bu mutlaqo ideal holat emas. Bunday vaziyatlar takrorlanmasligi uchun nima qilish mumkin? Mashg‘ulot o‘tkazmaslik.

Agar futbolchilar umuman mashg‘ulotlarda ishtirok etmasa, jarohat ham olmaydi. Ammo bunday holatda ular o‘yin ritmini yo‘qotadi va jamoa o‘yiniga yetarlicha ta’sir ko‘rsata olmaydi.

Bunday jarohatlar uchrashuvning ertasi kuni, oddiy mashg‘ulot paytida ham yuz berishi mumkin. Umid qilamanki, bu holat boshqa takrorlanmaydi.

Nima ham qila olamiz? Agar sehrgarlik qo‘limdan kelganida, shunchaki: «Bolalar, djakuziga boringlar, ertaga ko‘rishamiz», degan bo‘lardim», — dedi Arteta jurnalistlarga.

Eslatib o‘tamiz, «Arsenal» 13 oktyabr kuni UYEFA Chempionlar ligasi doirasida o‘z maydonida Fransiyaning «Lill» klubini qabul qiladi.

Hozircha Inkapye va Subimendining jarohatlari qay darajada jiddiy ekani hamda ularning navbatdagi uchrashuvda ishtirok etish imkoniyati haqida aniq ma’lumot berilmagan.