«Арсенал» бош мураббийи Микель Артета жамоа футболчилари Пьеро Инкапье ва Мартин Субимендининг жароҳат олишига муносабат билдирди.

Инкапье Англия Премьер-лигаси доирасида шанба куни «Лидс»га қарши ўтказилган учрашувнинг сўнгги дақиқаларида захирадан майдонга тушган эди.

Баҳс якунланганидан сўнг эквадорлик ҳимоячи қўшимча машғулот ўтказиш учун майдонда қолган ва шу жараёнда жароҳат олган.

Шунингдек, «Арсенал»нинг яна бир футболчиси Мартин Субименди ҳам жароҳатланган. Испаниялик ярим ҳимоячи «Лидс»га қарши учрашувнинг барча 90 дақиқасини захира ўриндиғида ўтказган эди.

Артета ўйиндан кейинги машғулотлар пайтида футболчиларнинг жароҳат олиши мураббийлар штаби учун мураккаб вазият эканини таъкидлади.

«Бу мутлақо идеал ҳолат эмас. Бундай вазиятлар такрорланмаслиги учун нима қилиш мумкин? Машғулот ўтказмаслик.

Агар футболчилар умуман машғулотларда иштирок этмаса, жароҳат ҳам олмайди. Аммо бундай ҳолатда улар ўйин ритмини йўқотади ва жамоа ўйинига етарлича таъсир кўрсата олмайди.

Бундай жароҳатлар учрашувнинг эртаси куни, оддий машғулот пайтида ҳам юз бериши мумкин. Умид қиламанки, бу ҳолат бошқа такрорланмайди.

Нима ҳам қила оламиз? Агар сеҳргарлик қўлимдан келганида, шунчаки: «Болалар, джакузига боринглар, эртага кўришамиз», деган бўлардим», — деди Артета журналистларга.

Эслатиб ўтамиз, «Арсенал» 13 октябрь куни УЕФА Чемпионлар лигаси доирасида ўз майдонида Франциянинг «Лилль» клубини қабул қилади.

Ҳозирча Инкапье ва Субимендининг жароҳатлари қай даражада жиддий экани ҳамда уларнинг навбатдаги учрашувда иштирок этиш имконияти ҳақида аниқ маълумот берилмаган.