«Manchester Yunayted» bosh murabbiyi Maykl Karrik jamoaning mavsum boshidagi qoniqarsiz natijalariga qaramay, o‘zini bosim ostida his qilmayotganini ma’lum qildi.
Manchesterliklar joriy mavsumda barcha musobaqalar doirasida o‘tkazilgan sakkizta uchrashuvning atigi ikkitasida g‘alaba qozongan.
Karrik UYEFA Chempionlar ligasi doirasida Madridning «Atletiko» klubiga qarshi o‘yin oldidan jamoadagi vaziyat va o‘ziga nisbatan bildirilayotgan tanqidlarga munosabat bildirdi.
«Hammasi bosim deganda nimani tushunishingizga bog‘liq. Biz nimani xohlayotganimizni va o‘zimizdan nimani kutayotganimizni yaxshi bilamiz. Bu talablar tashqaridan emas, o‘zimizdan kelib chiqadi.
Vaziyat qanday ko‘rinayotganini tushunaman, ammo buning bosimini his qilayotganim yo‘q. Men g‘alaba qozonishni va muvaffaqiyatga erishishni istayman.
Bizda hech qanday salbiy kayfiyat yo‘q. Aksincha, oldimizdagi qiyinchiliklarni qabul qilib, ularni yengishga harakat qilyapmiz.
Albatta, qiyin davrlar bo‘ladi. Agar murakkab vazifalarni bajarishga va qiyinchiliklarni yengib o‘tishga qodir bo‘lmasangiz, muvaffaqiyatga erisha olmaysiz.
Futbolda hammasini kichik tafsilotlar hal qiladi. O‘tgan o‘yinni yaxshi boshlay olmadik. Uchrashuvlarning so‘nggi daqiqalarida o‘tkazib yuborgan gollarimizning barchasi oldini olish mumkin bo‘lgan vaziyatlarda yuzaga keldi.
Biroq futbolda natijani aynan shunday kichik farqlar belgilaydi», — dedi Karrik.
