«Nyukasl» bosh murabbiyi Mattias Yayssle Angliya Premyer-ligasining 6-turida chempionat debyutanti «Koventri»dan qabul qilingan 1:4 hisobidagi yirik mag‘lubiyatga munosabat bildirdi.

Mutaxassis uchrashuvning ayrim qismlarida shogirdlari o‘yinni nazorat qilganini, biroq hal qiluvchi vaziyatlardagi xatolar qimmatga tushganini ta’kidladi.

«Bu og‘ir mag‘lubiyat. Ushbu ligada bunday xatolar uchun jazolanasan. Biz uchrashuvning ko‘plab qismlarida o‘yinni nazorat qildik, ammo bu yetarli bo‘lmadi.

O‘yin taqdiri jarima maydonlarida hal bo‘ladi. Biz esa aynan shu hududlarda yetarlicha yaxshi harakat qila olmadik. Endi bu mag‘lubiyatdan tezda to‘g‘ri xulosa chiqarishimiz kerak», — deya Yaysslening so‘zlarini keltiradi BBC.

Shuningdek, murabbiy jamoasining yoshligi va ayrim futbolchilarning jarohatdan tiklanayotganini mag‘lubiyatga bahona qilib ko‘rsatish niyatida emasligini bildirdi.

«Bizda yosh jamoa bor, lekin bu hech qanday bahona bo‘la olmaydi. Umid qilamanki, jarohatdan tiklanayotgan futbolchilarimiz tez orada maydonda ko‘proq vaqt o‘tkazish imkoniyatiga ega bo‘ladi.

Uchrashuvni umumiy baholaydigan bo‘lsak, biz u qadar yomon o‘ynamadik. Muxlislarimizdan uzr so‘rayman. Ular butunlay boshqacha natijaga loyiq edi», — deya qo‘shimcha qildi mutaxassis.

Ushbu mag‘lubiyatdan keyin «Nyukasl» 8 ochko bilan Angliya Premyer-ligasi turnir jadvalida 11-o‘rinni egallab turibdi.