«Ньюкасл» бош мураббийи Маттиас Яйссле Англия Премьер-лигасининг 6-турида чемпионат дебютанти «Ковентри»дан қабул қилинган 1:4 ҳисобидаги йирик мағлубиятга муносабат билдирди.

Мутахассис учрашувнинг айрим қисмларида шогирдлари ўйинни назорат қилганини, бироқ ҳал қилувчи вазиятлардаги хатолар қимматга тушганини таъкидлади.

«Бу оғир мағлубият. Ушбу лигада бундай хатолар учун жазоланасан. Биз учрашувнинг кўплаб қисмларида ўйинни назорат қилдик, аммо бу етарли бўлмади.

Ўйин тақдири жарима майдонларида ҳал бўлади. Биз эса айнан шу ҳудудларда етарлича яхши ҳаракат қила олмадик. Энди бу мағлубиятдан тезда тўғри хулоса чиқаришимиз керак», — дея Яйссленинг сўзларини келтиради BBC.

Шунингдек, мураббий жамоасининг ёшлиги ва айрим футболчиларнинг жароҳатдан тикланаётганини мағлубиятга баҳона қилиб кўрсатиш ниятида эмаслигини билдирди.

«Бизда ёш жамоа бор, лекин бу ҳеч қандай баҳона бўла олмайди. Умид қиламанки, жароҳатдан тикланаётган футболчиларимиз тез орада майдонда кўпроқ вақт ўтказиш имкониятига эга бўлади.

Учрашувни умумий баҳолайдиган бўлсак, биз у қадар ёмон ўйнамадик. Мухлисларимиздан узр сўрайман. Улар бутунлай бошқача натижага лойиқ эди», — дея қўшимча қилди мутахассис.

Ушбу мағлубиятдан кейин «Ньюкасл» 8 очко билан Англия Премьер-лигаси турнир жадвалида 11-ўринни эгаллаб турибди.