«Lion» Lois Opendaning kichik boldir suyagi sinishi sababli kamida bir oy xizmatlaridan foydalana olmaydi. Huquqlari «Yuventus»ga tegishli bo‘lgan belgiyalik hujumchi Fransiyada ijara asosida to‘p tepmoqda. U Liga 1 doirasida «Lans»ga qarshi uchrashuvda o‘ng oyog‘ining kichik boldir suyagini sindirib oldi. Fransiya klubi o‘z bayonotida ushbu bahsdagi hakamlikni ham tanqid qildi.
«Jarohat uchrashuvning so‘nggi daqiqalarida yuz berdi. Butun o‘yin davomida Lois Openda birinchi daqiqalardanoq ko‘plab qoidabuzarliklarga duch keldi, biroq hakamlar faqat bir marta intizomiy chora qo‘lladi. “Lion” hujumchisiga nisbatan bunday munosabatdan norozi. Klub futbolchi zarur himoya bilan ta’minlanmagan, deb hisoblaydi. Oqibatda u safdan chiqishiga sabab bo‘lgan to‘qnashuv yuz berdi», — deyiladi klub matbuot xizmatining bayonotida.
Ayni paytda «Lion» Fransiya Liga 1 chempionatida to‘rtinchi o‘rinni egallab turibdi.
