«Barselona» markaziy himoyachisi Pau Kubarsi Madridning «Real» klubi La Liga o‘yinlaridagi hakamlikdan norozi ekani haqidagi fikrlarini bildirdi.
«Qaymoqranglilar»ning «Vilyarreal»ga qarshi so‘nggi uchrashuvidan keyin yana bir janjal kelib chiqdi. Madridliklar golli vaziyatda Vinisius Juniorning maydondan chetlatilganidan norozi bo‘lishdi. Braziliyalik futbolchi raqibining sochidan tortgan edi. Endi u diskvalifikasiya sababli «El-Klasiko»ni o‘tkazib yuborishi mumkin.
«Men bu masalaga unchalik e’tibor qaratmayman. Meni ko‘proq o‘zimiz ta’sir ko‘rsata oladigan narsalar — jamoamizning o‘yini va muxlislarimizga nima bera olishimiz qiziqtiradi. Tashqaridan bo‘layotgan voqealar, rostini aytsam, bizni unchalik qiziqtirmaydi», — dedi Kubarsi Chempionlar ligasi doirasida «Galatasaroy»ga qarshi o‘yin oldidan o‘tkazilgan matbuot anjumanida.
25 oktyabr kuni «Barselona» o‘z maydonida Madridning «Real» klubini qabul qiladi.
