Madridning "Real" klubi sobiq himoyachisi Dani Karvaxal faoliyatini Ispaniyaning "Xetafe" jamoasida davom ettiradi.
34 yoshli futbolchi yangi klubi bilan shartnoma imzoladi. Kelishuv 2027 yilning iyun oyiga qadar amal qiladi.
Karvaxal "Real" bilan shartnomasi 2026 yilning 30 iyunida yakunlanganidan so‘ng erkin agent maqomida edi. Shu bois "Xetafe" uni transfer summasisiz o‘z safiga qo‘shib oldi.
Transferni rasmiylashtirish jarayonida ayrim qiyinchiliklar yuzaga keldi. Xususan, La Liganing moliyaviy nazorat qoidalari sabab futbolchini ro‘yxatdan o‘tkazish kechikdi. Keyinchalik klub rahbariyati zarur moliyaviy kafolatlarni taqdim etib, kelishuvni yakuniga yetkazdi.
Karvaxal "Real"ning asosiy jamoasida 2013 yildan 2026 yilga qadar to‘p surgan. U Madrid klubi bilan olti marta Chempionlar ligasida, to‘rt marta Ispaniya chempionatida g‘olib chiqqan. Shuningdek, Ispaniya terma jamoasi safida 2024 yilgi Yevropa chempionligini qo‘lga kiritgan.
Tajribali himoyachi endi Xose Bordalas boshqarayotgan "Xetafe" sharafini himoya qiladi. Uning yangi jamoasidagi ilk uchrashuvi 19 oktyabr kuni "Rayo Valyekano"ga qarshi Madrid derbisiga to‘g‘ri kelishi kutilmoqda.
