Italiya A Seriyasining 2026/2027 yilgi mavsumida to‘rtinchi murabbiy iste’fosi qayd etildi.

"Venesiya" klubi bosh murabbiy Jovanni Stroppa bilan hamkorlik to‘xtatilganini rasmiy sayti orqali e’lon qildi.

Mazkur qaror jamoaning Italiya chempionati 6-turida "Atalanta"ga qarshi o‘tkazgan uchrashuvidan so‘ng qabul qilindi. Bergamoda kechgan bahs "Venesiya"ning 1:3 hisobidagi mag‘lubiyati bilan yakunlangan edi.

Jamoa joriy mavsumda hozircha biror ochko jamg‘ara olgani yo‘q. "Venesiya" dastlabki olti turning barchasida mag‘lubiyatga uchrab, turnir jadvalining so‘nggi, 20-o‘rnini egallab turibdi.

Qoniqarsiz natijalarga qaramay, klub rahbariyati Stroppaga bajargan ishlari uchun minnatdorchilik bildirdi. Xususan, mutaxassisning o‘tgan mavsum yakunida "Venesiya"ni A Seriyaga olib chiqqani alohida e’tirof etildi.

Shu tariqa, Stroppa joriy mavsumda Italiya chempionatida o‘z lavozimini tark etgan to‘rtinchi bosh murabbiyga aylandi.

Eslatib o‘tamiz, sentyabr oyida "Fiorentina", "Bolonya" va "Parma" klublari ham bosh murabbiylarini almashtirgan edi.