Италия А Сериясининг 2026/2027 йилги мавсумида тўртинчи мураббий истеъфоси қайд этилди.
"Венеция" клуби бош мураббий Жованни Строппа билан ҳамкорлик тўхтатилганини расмий сайти орқали эълон қилди.
Мазкур қарор жамоанинг Италия чемпионати 6-турида "Аталанта"га қарши ўтказган учрашувидан сўнг қабул қилинди. Бергамода кечган баҳс "Венеция"нинг 1:3 ҳисобидаги мағлубияти билан якунланган эди.
Жамоа жорий мавсумда ҳозирча бирор очко жамғара олгани йўқ. "Венеция" дастлабки олти турнинг барчасида мағлубиятга учраб, турнир жадвалининг сўнгги, 20-ўрнини эгаллаб турибди.
Қониқарсиз натижаларга қарамай, клуб раҳбарияти Строппага бажарган ишлари учун миннатдорчилик билдирди. Хусусан, мутахассиснинг ўтган мавсум якунида "Венеция"ни А Серияга олиб чиққани алоҳида эътироф этилди.
Шу тариқа, Строппа жорий мавсумда Италия чемпионатида ўз лавозимини тарк этган тўртинчи бош мураббийга айланди.
Эслатиб ўтамиз, сентябрь ойида "Фиорентина", "Болонья" ва "Парма" клублари ҳам бош мураббийларини алмаштирган эди.
