«Manchester Yunayted»ning sobiq yarim himoyachisi Pol Skoulz jamoaning Angliya Premyer-ligasida «Tottenxem»ga qarshi o‘tkazgan uchrashuvidan (1:1) keyin futbolchilarning harakatlarini keskin tanqid qildi.

Maykl Kerrik shogirdlari mazkur bahsda raqib bir kishi kam bo‘lib harakat qilganiga qaramay, hisobdagi ustunlikni saqlab qola olmadi. «Tottenxem» 92-daqiqada javob golini kiritib, durangni ta’minladi.

Skoulzning fikricha, manchesterlik futbolchilarga hal qiluvchi vaziyatlarda ruhiy barqarorlik va g‘alabani saqlab qolish qat’iyati yetishmayapti.

«Bu jamoa, ochig‘ini aytganda, bosimga dosh berolmaydigan futbolchilardan tashkil topgan.

Aynan hozir g‘alaba qozonish kerak bo‘lgan palla. Bu chempionlikni qo‘lga kiritish degani emas, balki chempionlik uchun kurashish imkonini beradigan o‘ringa chiqib olish vaqti.

Hozirdanoq pul tikishga tayyorman: dekabr oyiga borib, bu jamoa chempionatda oltinchi yoki yettinchi o‘rinda bo‘lishi, Chempionlar ligasida esa qiynalib qolishi mumkin.

Shundan keyin ular kutilmaganda g‘alaba qozona boshlashadi. Chunki o‘sha paytga kelib, odamlar ularga unchalik e’tibor bermay qo‘ygan bo‘ladi», — dedi Skoulz The Good, The Bad & The Football podkastida.

Ma’lumot uchun, «Manchester Yunayted» joriy mavsumda Angliya Premyer-ligasining dastlabki oltita uchrashuvida atigi bir marta g‘alaba qozondi va ayni paytda turnir jadvalida 13-o‘rinni egallab turibdi.

Manchesterliklar so‘nggi to‘rtta o‘yinda g‘alaba qozona olmagan.

Noyabr oyidagi xalqaro tanaffusga qadar Maykl Kerrik shogirdlarini «Lids», «Bornmut», «Chelsi» va «Aston Villa»ga qarshi uchrashuvlar kutmoqda.