La Liga prezidenti Xavyer Tebas Ispaniya Oliy sport kengashi (CSD) uni Madridning «Real» klubi telekanali faoliyatini nasistlar Germaniyasida qo‘llanilgan targ‘ibot usullari bilan taqqoslagani uchun jazolash imkoniyatini ko‘rib chiqayotgani haqidagi xabarga munosabat bildirdi.
«Oliy sport kengashi (CSD) mening bayonotlarim sababli o‘z tashabbusi bilan chora ko‘rish imkoniyatini o‘rganayotgani haqidagi xabarga ishona olmayapman. Agar bu tasdiqlansa, tekshiruv men yozgan gaplarni o‘qish va ulardan oldingi ayrim voqealarni o‘rganishdan boshlanadi, deb umid qilaman.
Men quyidagilarni aytgan edim:
“Bu usul nasistlar Germaniyasining targ‘ibot vaziri Gebbels qo‘llagan targ‘ibot mexanizmlarini eslatadi: fikrni muntazam takrorlash, dushman obrazini yaratish va faktlarni muayyan qarashlarga moslashtirish. Mening taqqoslashim aynan shu targ‘ibot usullariga taalluqli, mafkuraga emas va, albatta, «Real» muxlislariga ham emas”.
Men aytgan gaplar shu edi. Bu — taqqoslash doirasi aniq cheklangan holda, ayrim axborot tarqatish usullariga nisbatan bildirilgan tanqid. Unga qo‘shilmaslik, hatto qat’iy ravishda qarshi chiqish mumkin. Ammo mumkin bo‘lmagan ishni qilish — ya’ni mening izohimni olib tashlash va menga ochiqchasiga rad etgan mafkuraviy o‘xshatishni nisbat berish mumkin emas.
Endi avvalgi voqealarga qaytaylik.
2026 yil 12 may kuni Florentino Peres «Real»dagi saylovlarni e’lon qilishga bag‘ishlangan matbuot anjumanida shunday degan edi: “Men 14 ta chempionlikni qo‘lga kiritishim mumkin edi, ammo qolganlarini mendan tortib olishdi”. «Negreyra ishi» haqida gapirar ekan, u yana: “Bularning barchasi o‘sha hakamlar”, — deb qo‘shimcha qilgan.
Bu gaplar «Real»ning rasmiy saytida e’lon qilingan. Anonim manbalarga murojaat qilishning hojati yo‘q.
Gap chempionatlardagi natijalarni o‘g‘irlik bilan izohlash va hozirgi hakamlarga nisbatan shubha uyg‘otish haqida ketmoqda. Musobaqaning yaxlitligi va nufuzini himoya qilishi kerak bo‘lganlar bunday holatga qanday baho berishi lozim?
Hakamlar bu gaplarni qoraladi. 21 sentyabr kuni esa AS nashri tekshiruvni olib borgan mas’ul federasiyadagi intizomiy ishni yopishni taklif qilgani haqida xabar berdi. Bunga so‘z erkinligi asos qilib ko‘rsatilgan.
Demak, savol aniq: turli bayonotlarni baholashda qanday mezon qo‘llanilmoqda?
Chempionlik undan tortib olinganini da’vo qilish so‘z erkinligi doirasida baholanadi-yu, targ‘ibot usullarini tanqid qilish, bunda mafkuralar taqqoslanmayotgani va muxlislarga ishora qilinmayotgani ochiq-oydin aytilgan bo‘lsa ham, o‘z tashabbusi bilan chora ko‘rishga asos bo‘ladimi?
Tartib-qoidalar va javobgarlik turlicha bo‘lishi mumkin. Ammo tashkilotlar o‘z qarorlarida izchillikni saqlashi shart.
Men aslida nima yozganimni o‘qishsin, qanday mezonlar qo‘llanilishini tushuntirishsin va ularni barchaga birdek tatbiq etishsin. So‘z erkinligi gapirayotgan odamning familiyasiga bog‘liq bo‘lmasligi kerak», — deb yozdi Tebas X ijtimoiy tarmog‘idagi sahifasida.
