«Inter Mayami» hujumchisi Lionel Messi AQSHning MLS chempionatida yana bir ajoyib goli bilan e’tibor markaziga tushdi.
Argentinalik futbolchi «Atlanta Yunayted»ga qarshi uchrashuvda dubl qayd etib, jamoasining 3:1 hisobidagi g‘alabasiga katta hissa qo‘shdi.
Ayniqsa, Messining mazkur bahsdagi birinchi goli tomoshabinlarda katta taassurot qoldirdi. Ushbu golni futbolchining Shimoliy Amerikadagi faoliyati davomida urgan eng chiroyli gollaridan biri sifatida baholash mumkin.
Messi to‘pni maydon markaziga yaqin hududda qabul qilib, o‘ziga xos uslubda — tezkor va qisqa qadamlar bilan raqib darvozasi tomon harakatlandi.
Jarima maydonchasiga yaqinlashgach, argentinalik hujumchi jamoadoshi bilan devor usulida kombinasiya tashkil qildi.
Biroq sherigi kutilmaganda joyida to‘xtab qolib, Messining yo‘lida to‘siqqa aylandi. Shunga qaramay, tajribali futbolchi uni xuddi mashg‘ulotdagi to‘siqni aylanib o‘tgandek osonlik bilan chetlab o‘tdi.
Shundan so‘ng Messi gavdasi bilan mohirona aldamchi harakat bajarib, so‘nggi himoyachini ham ortda qoldirdi.
Hujum yakunida u o‘ta aniq zarba yo‘llab, to‘pni «Atlanta Yunayted» darvozaboni yonidan to‘rga joyladi.
Shu tariqa, Messi navbatdagi dublini rasmiylashtirish bilan birga, MLSdagi faoliyatining eng esda qolarli gollaridan biriga ham mualliflik qildi.
