«Интер Майами» ҳужумчиси Лионель Месси АҚШнинг МЛС чемпионатида яна бир ажойиб голи билан эътибор марказига тушди.

Аргентиналик футболчи «Атланта Юнайтед»га қарши учрашувда дубль қайд этиб, жамоасининг 3:1 ҳисобидаги ғалабасига катта ҳисса қўшди.

Айниқса, Мессининг мазкур баҳсдаги биринчи голи томошабинларда катта таассурот қолдирди. Ушбу голни футболчининг Шимолий Америкадаги фаолияти давомида урган энг чиройли голларидан бири сифатида баҳолаш мумкин.

Месси тўпни майдон марказига яқин ҳудудда қабул қилиб, ўзига хос услубда — тезкор ва қисқа қадамлар билан рақиб дарвозаси томон ҳаракатланди.

Жарима майдончасига яқинлашгач, аргентиналик ҳужумчи жамоадоши билан девор усулида комбинация ташкил қилди.

Бироқ шериги кутилмаганда жойида тўхтаб қолиб, Мессининг йўлида тўсиққа айланди. Шунга қарамай, тажрибали футболчи уни худди машғулотдаги тўсиқни айланиб ўтгандек осонлик билан четлаб ўтди.

Шундан сўнг Месси гавдаси билан моҳирона алдамчи ҳаракат бажариб, сўнгги ҳимоячини ҳам ортда қолдирди.

Ҳужум якунида у ўта аниқ зарба йўллаб, тўпни «Атланта Юнайтед» дарвозабони ёнидан тўрга жойлади.

Шу тариқа, Месси навбатдаги дублини расмийлаштириш билан бирга, МЛСдаги фаолиятининг энг эсда қоларли голларидан бирига ҳам муаллифлик қилди.