Испаниянинг ABC газетасида Ла Лиганинг «Бетис» ва «Барселона» ўртасидаги учрашувига бағишланган мақола эълон қилинди. Каталонияликларнинг 5:2 ҳисобидаги ғалабаси билан якунланган баҳсдан сўнг журналист Сальвадор Сострес бош ҳакам Рикардо де Бургоснинг фаолиятини кескин танқид қилди.

«Барса» ва де Бургос «Бетис»ни бўғиб қўйди», — деган сарлавҳа остида чоп этилган мақолада ҳакамнинг баҳсли қарорларига алоҳида эътибор қаратилган.

Журналистнинг фикрича, де Бургос ўз қарорлари билан учрашувни барбод қилган. Сострес бир қатор вазиятларни, жумладан, Факундо Бернальнинг майдондан четлатилишига сабаб бўлган тортишувни мисол сифатида келтирган.

«Ўша вазиятда де Бургос яна бир бор ўзининг иккиюзламачилигини намойиш этди. Ламин Ямал биринчи бўлиб тажовузкор ҳаракат қилгани учун фақат сариқ карточка олди, Факундо Берналнинг жавоб ҳаракатлари эса қизил карточка билан жазоланди», — деб ёзди журналист.

Сострес, шунингдек, Ямалнинг Мадриднинг «Реал» клубига қарши бўлиб ўтадиган «Эл-Класико»да иштирок эта олиши, Винисиус Жуниор эса яқинда олган дисквалификацияси сабабли ушбу муҳим учрашувни ўтказиб юборишига ҳам эътибор қаратди.

«Гарчи бу ҳолат Моуриньонинг вазифасини енгиллаштириши мумкин бўлса-да, Винисиуснинг «Эл-Класико»да ўйнай олмаслиги, Ламиннинг эса майдонга тушиши мумкинлиги — ҳақиқий шармандалик», — дейилади мақолада.

Журналистнинг хулосасига кўра, «Бетис» ҳакам босими ва оддий омадсизлик туфайли руҳан синган.

Шу тариқа, «Барселона»нинг йирик ғалабаси Испания матбуотида ҳакамлик қарорлари юзасидан жиддий баҳс-мунозараларга сабаб бўлди.