Italiya terma jamoasi va «Roma» klubining sobiq hujumchisi Franchesko Totti koronavirus bilan kasallangan davrida hayoti jiddiy xavf ostida qolganini ma’lum qildi.
Afsonaviy futbolchi kasallikni qanday og‘ir o‘tkazgani haqida so‘zlab berdi.
«O‘limimga bir bahya qolgandi. Otam ham shu kasallikdan vafot etgan. Meni shifoxonaga olib ketishmoqchi bo‘lishgan. Uch hafta davomida tana haroratim 39 daraja bo‘ldi, nafas olishga qiynaldim.
Shunga qaramay, omon qolishga muvaffaq bo‘ldim. Vaholanki, o‘sha paytda hayot va o‘lim orasida edim», — deya Tottining so‘zlarini keltiradi Corriere della Sera nashri.
Eslatib o‘tamiz, Totti butun professional faoliyatini «Roma»da o‘tkazgan. Shuningdek, Italiya terma jamoasi safida 58 ta uchrashuvda maydonga tushib, 9 ta gol urgan.
