Madridning «Real» klubi Yevropa Superligasini tashkil etish uchun sarflangan mablag‘larning bir qismini Angliya Premyer-ligasining oltita klubidan qaytarib olishni istamoqda.
The Athletic nashri bir nechta manbaga tayanib xabar berishicha, madridliklar «Arsenal», «Chelsi», «Liverpul», «Manchester Siti», «Manchester Yunayted» va «Tottenxem» Superliga loyihasini amalga oshirish uchun dastlab sarflangan xarajatlarning o‘zlariga tegishli ulushini qoplashi kerak, deb hisoblamoqda.
«Real»ning fikricha, ushbu klublar keyinchalik loyihada ishtirok etishdan voz kechgan bo‘lsa ham, dastlabki xarajatlarni qoplash majburiyatidan ozod bo‘lmasligi lozim.
Manbalardan birining ma’lum qilishicha, qaytarilishi talab etilayotgan umumiy mablag‘ 80 million yevroga yetishi mumkin.
Avvalroq Superliga turnirini targ‘ib qilish bilan bog‘liq xarajatlarni «Real», «Barselona» va «Yuventus» o‘zaro taqsimlab kelgan.
Yevropa Superligasi tashkil etilgani haqida 2021 yilning aprel oyida e’lon qilingan edi. Loyiha 12 ta top-klub ishtirokidagi yopiq xalqaro musobaqani o‘tkazishni nazarda tutgan.
Biroq klublarning aksariyati dastlabki bir necha kun ichidayoq loyihadan chiqib ketgan.
«Yuventus» 2023 yilda Superligada ishtirok etishdan voz kechgan bo‘lsa, «Barselona» va «Real» 2026 yilda loyihani tark etgan.
