"PSJ" hujumchisi Dezire Due uni "Oltin to‘p" sovrini uchun 30 nafar nomzod qatoriga kiritishmaganiga munosabat bildirdi.
2025/26 yilgi mavsum yakunlariga ko‘ra jahonning eng yaxshi futbolchisiga topshiriladigan sovrin 26 oktyabr kuni Londonda o‘z egasiga topshiriladi. Bir yil avval Dezire mazkur ovoz berishda 14-o‘rinni egallagan edi.
"Bugun men "Oltin to‘p" uchun nomzodlar ro‘yxatida yo‘qman. Odamlar o‘z tanlovini qiladi. Mayli, hayot shunaqa.
Men qattiq mehnat qilishda davom etyapman. Bu mavsumdagi maqsadim — hammani dog‘da qoldirish va barcha sovrinlarni yutish. Shuning uchun ishlashda davom etamiz.
Men doimo mehnat qilaman. Men juda ko‘p ishlaydigan insonlardanman. Bugun bu mehnatim samara beryapti, ammo yanada kattaroq natijalarga intilish kerak. Mening katta ambisiyalarim bor. Ushbu seshanba kuni shunday natija ko‘rsata olganim juda yaxshi, lekin men bundan ham ko‘prog‘iga qodirman.
"Oltin to‘p"ni "PSJ" futbolchisi olishi kerak. Yoki fransuz futbolchisi — chunki biz ham klub safida, ham jahon chempionatida o‘zimizni juda yaxshi ko‘rsatdik. Jamoamizda ulkan, haqiqatan ham favqulodda iqtidorga ega futbolchilar bor. Shuning uchun ko‘ramiz", — dedi Due Chempionlar ligasi doirasidagi "PSJ" — "Barselona" (4:2) uchrashuvining eng yaxshi futbolchisi deb topilganidan so‘ng. Ushbu bahsda hujumchi bitta gol urdi va bitta golli uzatmani amalga oshirdi.
