Milanning "Inter" klubi yarim himoyachisi Karlos Augusto Chempionlar ligasi umumiy bosqichining 3-turida "Shaxtyor" ustidan qozonilgan g‘alabadan so‘ng o‘z fikrlarini bildirdi.
"Neradzurri" o‘z maydonida o‘tkazilgan uchrashuvda bir kishi kam bo‘lib qolishiga qaramay, 1:0 hisobida g‘alaba qozondi. Bahsdagi yagona golga braziliyalik futbolchi mualliflik qildi.
"Bu juda muhim gol bo‘ldi. Mxitaryan ajoyib uzatmani amalga oshirdi. Jamoamizni g‘alaba bilan tabriklamoqchiman.
O‘n kishi bo‘lib o‘ynash juda qiyin. Biz esa g‘alabani qanchalik qattiq istaganimizni ko‘rsatdik.
Chempionlar ligasida har bir uchrashuv og‘ir kechadi", — deya Augustoning so‘zlarini keltiradi UYEFA matbuot xizmati.
"Inter" Chempionlar ligasidagi navbatdagi uchrashuvini safarda Niderlandiyaning "Feyenoord" klubiga qarshi o‘tkazadi.
