Portugaliyalik hujumchi Krishtianu Ronaldu faoliyatidagi gollari sonini 982 taga yetkazdi. 41 yoshli futbolchi Saudiya Arabistoni chempionatining navbatdagi uchrashuvida ham raqib darvozasini ishg‘ol qildi.
Ronaldu to‘p surayotgan «An-Nasr» safarda «Al-Faysaliy» jamoasini 3:1 hisobida mag‘lubiyatga uchratdi. Mehmonlarning gollaridan biri aynan portugaliyalik yulduz hisobiga yozildi.
Uchrashuvdan keyin Ronaldu ijtimoiy tarmoqdagi sahifasida o‘yindan olingan bir nechta suratni e’lon qildi. Qizig‘i, u mazkur suratlarga atigi bitta so‘zdan iborat izoh qoldirdi.
«Olg‘a!» — deb yozdi portugaliyalik futbolchi.
Shu tariqa, Ronaldu faoliyati davomida 1000 ta gol urishdek tarixiy marraga yana bir qadam yaqinlashdi. Hozirda unga ushbu natijaga erishish uchun yana 18 ta gol kerak.
«An-Nasr» esa g‘alabadan keyin Saudiya Arabistoni Pro-ligasi turnir jadvalida peshqadamlik uchun kurashni davom ettirmoqda.
Ayni paytda «An-Nasr» va «Al-Qodisiya» 25 ochkodan jamg‘arib, birinchi o‘rinni bo‘lishib turibdi.
Biroq 24 ochkoga ega «Al-Hilol»da mazkur ikki jamoadan o‘zib ketish imkoniyati bor. Chunki ushbu klub raqiblariga nisbatan bitta kam o‘yin o‘tkazgan.
